Ang Kuwento ni Laong (Epiko)

Orihinal na kuwento ni May Anne Joy D. Romanes

majromanes57@gmail.com

Noong unang panahon ay may isang ginoong nagngangalang Laong. Si Laong ay isang datung pinaniniwalaang galing sa lipi ng mga bathala, kung kaya’t siya ay may pambihirang kapangyarihan. Si Laong ay namumuno sa tribo ng mga Diwali. Isa itong napakatahimik ngunit malakas na tribo. Bagamat may ilang tribo na nagtangkang sakupin ang tribo, hindi nila ito magawa dahil madali silang nagagapi ni Laong.

Dumating ang panahon na nangailangan si Laong na lumisan muna sa kanyang tribo at pumunta sa kapatid nitong si Dimasilaw. Walang naiwan para mamuno sa mga Diwali, kaya sinamantala ni Yabadi, ang pinuno ng kalabang tribong Tukoda ang pagkakataon. Sumugod sila sa tribo ng Diwali at sinunog ang kanilang mga kubo. Binihag nila ang mga babae at batang Diwali at ginawa namang alipin ang mga lalaki.

                Nang bumalik si Laong ay nakita niya ang kalunos-lunos na sinapit ng kanyang nasasakupan. Dahil dito, pinagplanuhan nila ni Dimasilaw at ang mga tauhan nito ang pagsalakay sa tribo ng Tukoda.

                Nang dumating sila sa nasasakupan ni Yabadi ay nagpanggap na utusan ang mga tauhan ni Dimasilaw. Dahil kilala ng mga tao si Laong at Dimasilaw ay hindi sila sumama sa mga nagpapanggap. Ginamit nila ang kanilang kapangyarihan at ginaya ang anyo ni Yabadi at ang reyna nito. Dahil dito, napalaya ang mga ka-tribo ni Laong.

                Huli na ng nalaman ni Yabadi ang ginawa ni Laong at Dimasilaw. Binihag nila si Yabadi at sa tulong ng kapangyarihan ni Bathala, ay ikinulong nila ito sa isang maliit na bote.

                Simula noon, wala ng nangtangkang sumalakay sa mga Diwali. Naging tahimik na ang tribo ni Laong at siya ay namuno pa ng ilang daang taon.